لاجل حياة زوجية سعيدة

السلام عليكم ورحمة الله وبركاته


كل واحدة عايزة جوزها يحبها ويفضل يقولها كلام حب دايما دايما وعلشان روتين ورتم الحياة الى احنا فيها بقيت حياتنا مملة ورتيبة وعلشان يرجع الحب لبيتنا والغرام وكلام ايام الخطوبة لازم نغير شوية ونبعدعن الروتين ...عايزة تعرفى ازاى تابعى الوصفات السحرية دى وصدقينى هتتغير حياتك كلها .....
(1) دايما دايما كل يوم قوليله بــــــــحـبــك واحدة بعد الفطا ر وواحدة بعد الغداء وواحدة بعد العشاء ذى الدواء كدة علاج للروتين
هو هيستغرب شوية فى الاول ويقولك كان فين من زمان ده تقوليله معلش يا حبيبى بقى تغيير على حياتنا اصل الدنيا بتتغير وانا كمان عاوزة اتغير واقرب من قلبك شوية ماشى ولا انت زعلان ......( ههههههههههههه)

انتظروا المزيد والمزيد قريبا جدا ......

النصيحة التانية.....
كل يوم صحى جوزك فى الفجر
( عايزة تعرفى ازاى تصحيه بسهولة وكمان متنرفزهوش؟؟؟.....اغسلى ايدك بماية دافية وبعدين رشى على ايدك شوية برفان
بس تكون ريحته حلوة مش بقاله 20 سنة عندك لحد ماريحته بقت تنر ههههههه
وبعدين روحى جنبه وقربى ايدك من انفه واوعى تكتمى نفسه وتقولى اصله عنده زكام الا يموت قبل ماتصحيه اصلا وتقولى معرفش ياخوى جراله ايه مجتش جنبه وانت اتاريكى كتمتى نفسه الله يعينه....

المهم براحة وبشويش ونعومة كدة لحد مايصحى وبعدين خليه يتوضأ ويصلى بيك الفجر هو إمامك وصدقينى هتلاقى حياتكوا بتتغير واحدة واحدة ويرجع الحب للبيت... جربى هتخسرى ايه)



نصيحة النهاردة (رقم ثلاثة ) يا ترى جربتوا الى فاتوا ولا هتقولوا اهو كلام وخلاص............يا ستى جربى هتخسرى ايه ...يلا المهم خلينا فى النصيحة الى بعدها

هى نصيحة رخيصة فى ثمنها اوى اوى لكن غالية عند جوزك اوى اوى واغلى عند ربنا
( شوفى يا ستى ...خدى بالك معاى اوعى تكونى سرحتى فوقى بقى
طب يلا بصى مثلا وجوزك نازل للشغل الصبح امسكى ايده وشبكيها فى ايديكى وادعيلوا دعاء من قلبك بس سمعيه الدعاء الا يقول دى بتدعى على ما ارجعش تانى لا ادعيلوا بصوت عالى وقوليلوا مثلا ( ربنا يبعدك عن كل ما يغضب الله ويجعل طريقك نور وعن يمينك نور وعن شمالك نور ومن فوقك نور ..اللهم ابعد عنك كل ظالم مغرور واجعل عملك لله مقبول واجعل قلبك بالله معمور واجعل ذنبك لله مغفور ..اللهم ارجعك الينا سالما معافى وعلى وجهك احلى ابتسامة ...اللهم امين يا رب العالمين )وفى الاخر قليولو مثلا هتوحشنى اوى متتاخرش على بقى سلام الله عليك
جربى دى واظن مش هتاثر عليكى دى هتقربك من جوزك جربى وهتدعيلى ان شاء اللههههههههههه




نصيحة رقم اربعة
جوزك بيروح كل يوم الشغل ..اكيد بيكون معاه شنطة او مثلا كتب او حتى ممكن من غير حاجة خالص وانا عندى لكى فكرة تعمليها تغيير من حياتك وتعبرى بها عن حبك لجوزك ....بصى معاى كدة جيبى ورقة ملونة مثلا روز وقطعيها على شكل قلب واكتبى فيها اى كلام حلو لجوزك تعبرى بيه عن مشاعرك يعنى مثلا ( انت احلى انسان فى حياتى / بحبك يا احلى انسان فى الوجود /اكبر نعمة ربنا عطهالى انو خلانى زوجتك/ لو خيرونى بين الدنيا وبينك اختارك انت /كل الناس بيمروا على بالى الا انك وحدك الى ساكن فيه/ سالونى مين اغلى انسان قلتلهم اسالوا قلبى مين ساكنوا من غير ايجار/كل الدنيا تهون الا لما بتبعد عنى بيصيبنى الجنون ..................) كلمات كتير ومعانى اكتر ممكن نقولها بس بطريقة مختلفة ...
المهم بعد ما تكتبيها حطى الورقة دى فى المكان الى جوزك بيشوفه كل يوم لو هو بيشيل شنطة حطيهاله فيها او حطيها فى جيبه قبل ما ينزل .....شوفى انتى بقى المهم خليها مفاجأة ليه ...ويا ريت تكرريها دايما وكل مرة بكلام جديد ومكان جديد ....جربى وان شاء الله تلاقى نتيجة طيبة






نصيحة (5)
جربتوا حاجة من النصايح ولا معملتوش حاجة.......يا ستى جربى هتخسرى اييييييييييييه
المهم خلينا فى النصيحة الجديدة لعل وعسى !!!!!!!!!!!!!



فى يوم من الايام افتكرتى جوزك حبيبك وطبعا ما اكثر تذكرررررك ليه....صح ولا ايه المهم قلتى لما ابعتله رسالة حلوة على الموبايل بس اكيد مش الـــــــــحق الولد تعبان ولا ملقتش بصل النهاردة فى البيت وجبلى وانت جااااى
لا رسالة واحدة بتحب جوزهااااا وممكن تقوليلوا كلام حلو تعبرى فيه عن مشاعر جميلة زى ( اشتاقتلك ارجعلى اوام مستنياك .../كل ثانية بتعدى وانت بعيد بحس انى وحيدة حتى لو كنت فى وسط الناس ..../عيونى بتسأل كل ثانية عليك علشان وحشتنى اوووووى ..../شوفى اى كلام جواكى وقوليه ...) وصدقينى زوجك ان شاء الله هيتأثر بالكلام ده اوى ويحاول ميتاخرش زى عادته علشان يجيلك بسرعة

الى كل زوجة طول ما انتى بدورى على الحب فى بيتك وعاوزة تحافظى عليه ربنا هيساعدك ويثبتك


المرة دى جايلكم بنصيحة لكن رائعة ويا رتكم كلكم تعملوها حتى انتوا واخواتكم.... وازواجكم اكيد (اعبدوا ربنا سوا )
ايه احلى من انكم تقابلوا ربنا سوا فى الصلاة فى قراءة القران فى قراءة سيرة حبيبه المصطفى(عليه افضل الصلاة والسلام ) ...........

تعرفوا !!!تحبوا ربنا فى ازواجكم وزوجاتكم !!!صدقونى حياتكم هتتغير مليون الف مرة دى الملايكة هتكون حواليكم فى كل وقت لانها بتكون مع القوم الذين يذكرون الله سويا وكمان ربنا هيكرمكم فى وقتكم واموالكم وذريتكم ان شاء الله

خدوها نصيحة وانا فى وجهة نظرى دى احلى حاجة واصدق حاجة ان يرجع الحب للبيت تانى (الحب الى كل واحد فينا بيتمنه فعلا )

يا رب يكرم كل زوجين بيحبوا بعض عشان بيحبوا الله بصدق من كل قلوبهم.............

يتبع

تتمة الموضوع
هل تعرفين بما وصف الله الحور العين فى الجنة ؟؟؟؟؟؟؟؟؟؟؟
لقد قال عنهم
قال تعالى ( عربا اترابا ).............صدق الله العظيم
هل تعرفين ما معنى هذه الاية؟؟؟؟
اى عاشقات يتغزلن فى ازواجهن ويقولن الكلام الجميل الذى يذوب فيه حبك لزوجك اما سألتى نفسك كم مرة قلتى ولو كلمة جميلة تتغزلين فيها فى زوجك !!!!!!!!!!!!
نعم زوجك يحب ان تتغزلى فيه ولكن كيف ؟؟؟؟
ماذا يمكن ان تقولى له؟؟؟؟؟؟...يمكنك ان تتغزلى فى رجولته وكيف انه يحميكى من هذه الدنيا ..كيف انه سندك ...كيف انه كريم معك لايتاخر عنك فى طلب ...كيف انه يملك الحنان الذى يفيض عليك ...كيف انه طيب القلب يسمعك عندما تكونى محتاجة له ...والكثير والكثير مهما قلت لن احصى لكن كل واحدة تعرف جيدا الصفات الجميلة فى زوجها وانا اعرف ايضا ان هناك الصفات السيئة ولكن ان الله لم يخلقنا كاملين دون نقص فالكمال لله وحده ولكن عندما خلق بينا المميزات خلق فينا العيوب ولكن باستطاعتك بحنانك عليه وتوددك اليه ان يقلل من هذه العيوب ...................لا تتركى حبك لزوجك وحنانك عليه مهما طال الزمن فالحب بين الزوجين هو عبير حياتهما معا.......






تفتكرى ايه ممكن يخليكى سعيدة مع جوزك ؟؟؟؟؟؟
انه يفضل يقولك كلام حلو عمال على بطال ولا انه يشتري لك هدية غالية لا انه يوديك لبيت اهلك فى الوقت الى تحبيه ولا مثلا انه يخدك ويخرجك ويعشيكى عشوة لطيفة ؟؟؟
ايه اكتر حاجة ممكن يعملهالك وتحسى بجد بحبه ليكى وخوفه عليكى هل حاجة من الى سبق وقلتهم ولا حاجة تانية ؟؟؟؟
لكن انا فى اعتقادى الشخصى انى اكتر لحظة ممكن احس ان الزوج بيحب زوجته لما تكون فى وقت تعبانة اوى او محتجاله اوى وهو واقف جنبها وايده ماسكة ايدها ويقولها متخفيش انا جنبك اعتقد اللحظة دى لوحدها تساوى كتييييييييييييييير اوى بس يا ترى انتى عملتى ايه عشان لما تحتاجى اللحظة دى تلاقيها وهو يدهالك عاوزة تعرفى تعملى ايه ؟؟؟؟؟
لما يحس فى وقت انه ضعيف ومحتاجلك اوعى تسيبيه واوعى تتخلى عنه لو فى يوم حصلتله مشكلة او ربنا اراد وماله ضاع او حد من اهله ربنا افتكره او كان داخل على خطوة كبيرة فى حياته وانتى كنتى انانية بتفكرى فى نفسك والى انتى عاوزاه صدقينى ساعتها هتتمنى لو كنت معملتيش كدة عشان تعيشى لحظة وقوفه بكل روحه وقلبه جنبك.................






انا النهاردة مش جاية اديكى نصيحة لكن جاية اكلمك عن حاجة حلوة اوى وكلنا نفسنا فيها وهى انك تحب وتتحب اكيد دى حاجة ربنا خلقها فينا وصحيح ان احنا نفسنا نحب كل الناس ونكون محبوبين منهم لكن فيه اشخاص مميزة فى حياتنا نحب يكونوا معانا دايما يحسوا بحبنا ليهم وهما كمان يكونوا بيحبونا وميقدروش يستغنوا عنا ......
اى بنت بتتمنى يكون جنبها انسان تحبه ويحبها ويكون هو حياتها بس يا ترى مين هو الى يستاهل ياخد الحب الى فى قلب البنت كله ويبقى هو محور حياتها ويستاهل كل لحظة تعدى عليها الا ويكون قلبها مشغول بيه ويفكر فيه ؟؟؟؟؟؟؟؟؟؟؟هل ممكن يكون اى شخص كدة ولا لازم يكون انسان مميز يكون قريب منها يكون بيتمناها هى وبس ومش عاوز غيرها!!!!!!!! ساعتها هو الى يستاهل كل ده ولو فكرتى شوية فى جوزك هتلاقى انه بتتوفر فيه كل الشروط الى انا قلتها عشان يكون هو حبيبك
تعالى نراجعها سوا ....
اولا قريب منك مفيش اقرب منه فى حياتك ........يكون محور حياتك مفيش غيره فى حياتك اصلا وهو الى ربنا اخترهولك فاكيد اى واحد فى الدنيا مش هيكون مناسب ليكى غيره ..........يكون بيتمناكى ومش عاوز غيرك طب مسالتيش نفسك اشمعنى اختارك انتى مهو البنات كتير جدا اشمعنى انتى الى اختارك عشان تكونى نصه التانى وتكملى معاه حياته الى باقية واكيد هتبقى اطول من الى عاشها فى بيت اهله ..........صدقينى لو فكرتى هتلاقى انه هو لوحده الى يستاهل يبقى حبيبك ومش هقولك ساعتها تعملى ايه لحبيبك عشان ترضيه لان الى بيحب حد اوى بيبقى نفسه فى اى لحظة يشوف لحظة الرضا والحب فى عين الى بيحبه ...........
الحب احلى احساس ممكن الانسان يحس بيه ويعيشه لو كل واحدة او واحد حبوا ازواجهم فعلا هيلاقوا الجنة على الارض الى النبى عليه افضل الصلاة والسلام قال عليها ( الدنيا متاع وخير متاعها المرأة الصالحة )تعرفى تقولى لجوزك وانتى باصة فى عينه كدة بحبك تقوليله انك كل حياتى انه الدنيا كلها متسواش لحظة تكون جنبى ..............
يا ريتنا نفهم كدة وبدل ما ندور على الحب بره والكلام ده لاى بنت او شاب سواء متجوز او لسة نحاول نخليه لازواجنا ساعتها هنلاقى مليون كلمة واحساس ممكن ندهولهم بجد وهنلاقى الحب ومشاعره وجماله الى احنا بندور عليه فى كل لحظة ...........اتمنى للجميع حياة سعيدة وجنة جديدة على الارض صنعناها بانفسنا ولكن فى رضا الرحمن ( جنة الحب )............






الصبر مفتاح الفرج مثلما يقول الكثيرين وقال الله فى محكم اياته (انما يوفى الصابرون اجورهم بغير حساب ) وقال رسول الله صلى الله عليه وسلم (الصبر ضياء ) فان اعظم ما يعطى العبد من نعمة هى الصبر فهى علامة حب الله لك او لكى .....
كانت هذه البداية التى اردت بها ان افتح المجال لكلامى وهى ان تصبرى او ان تصبر على عيوب الطرف الاخر فكل انسان مثلما فيه من المزايا فيه من العيوب ولا نقول انه يوجد انسان بدون نواقص او عيوب لان الكمال لله وحده حبيبتى اذا كنت تعانين من عيب ما فى زوجك وشريك حياتك فهذا طبيعى لاننا جميعا عندنا عيوب وممكن نكون مش شا يفنها يعنى قبل ما تفكرى فى عيوب جوزك فكرى ان انتى كمان عندك عيوب وصدقينى العيوب دى ممكن اوى تتغير لو انتى ساعدتيه يغيرها لكن اكيد مش هيكون انك تقوليله انا بكره تصرفك ده اوعى تعمله تانى او تقوليله ايه العك الى انت بتعمله ده دى تصرفات تتعمل او هكذا من الكلمات التى لن توصلك الى شىء الا الغضب الذى يمكن ان يصل لعواقب تانية لكن مثلا تقوليله يا حبيبى انت احسن انسان فى الدنيا وكل حاجة فيك جميلة بس مثلا لما بتزعل وبتتنرفز جامد اوى كدة بخاف عليك الا تتعب بعدين وانا مليش غيرك فى الدنيا ومقدرش ابدا على زعلك منى ده (ده لو كان عصبى او من النوع الى بيتنرفز بسرعة )
وهكذا لكل مشكلة او عيب فى زوجك ومن المهم اوى انك تفتكرى حاجة اوعى دايما تبصى لعيوبه وبس متشوفيه مميزاته واد ايه حبه ليكى وخوفه عليكى ساعتها هتحسى انك ممكن تتحملى اى عيب فيه بس ميبعدتش لحظة عنك ..............
(وفى الاخر الى بيحب حد بيبقى عارف ان فيه عيوب لكن بيحبه زى مهو لانه زى ما حيبيه فى عيوب هو كمان فيه عيوب وزى مهو اتحمل عيوبى انا لازم اتحمل عيوبه وفعلا الى بيحب حد اوى بيشوفه احسن انسان فى الدنيا كفاية انه بيحس جنبه ان عايش فعلا صدقونى بجد الزواج ده مش نهاية الحب لا لو انتوا تفكروا كويس هتلاقوه بدايته لانه بداية انه يعيش جنبك انسان بتحبه
ليه متحبوش ازواجكم او الازواج يحبوا زوجاتهم ,,,,,,,,تحبوهم يعنى حب يعنى لغة احباب ولو حتى تقولوا لبعض كلمات الحب معتقدتش ان الكلام ممكن ياخد وقت مهو زى مبتقولى هاتلى وانت جاى بطاطس ومتنساش العيش ومتتاخرش عشان الحق اعمل الغدا ممكن تقوليله يا حبيبى اوعى تنسى الى طلبته منك الا بعدين هنقعد من غير غدا وانا مقدرش اسيب حبيبى جعان فمتتاخرش على الى بيموتوا فيك (الى هو انتى يعنى )اكيد مش حد غريب ...............كدة مثلا والى انتى تقدرى تقوليه قوليه حسسيه بالحب يا ريتنا فعلا نبطل نفكر فى ان الجواز ده بداية الخنقة ونبصله ان بداية السعادة ساعتها هنشوف كل حاجة جميلة طبعا المشاكل عمرها مبتتنتهى لكن الحب بيقتل ملل المشاكل الى بنتعرضلها لاننا دايما بنحس ان فيه حد جنبنا بيخاف علينا ويحبنا وميقدرش على بعدنا (فكرى اوفكر شوية ممكن ايه يحصلك ليكى او يحصل ليك لو جوزك او مراتك بعدت عنك فجأة صدقونى هتلاقوا الدنيا بقت غربة ..............
اوجدوا الحب فى بيوتكم هتلاقوا الدنيا اجمل كثيرا